فضيلة الامام الشيخ الشعراوى بيحكى

أحب أقول لسواق التاكسي أو التوك توك إللي بيزعل لما حد يقوله معلش دخلنى الشارع عشان تعبان أو عندى ظروف أو معاه شيلة مش قادر يمشي بيها والسواق بيبقي مخڼوق من الزبون وقرفان منه وكمان بيستغله

فضيلة الامام الشيخ الشعراوى بيحكى مرة إنه كان رايح زمان يزور واحد من زمايله في إسكندرية وكانوا راكبين تاكسي وكانوا في الشتا والدنيا مطر وسواق التاكسي جه علي اول الشارع ومرضيش يدخل وقالهم هتنزلوا هنا علشان الطينة والتاكسي هيتوسخ . الشعراوى بيقول رفضنا ننزل من التاكسي وقولناله هنمشي إزاى يابنى في الطينة دى ؟ المهم عملوا معاه مشكلة وشدوا معاه لغاية ما سواق التاكسي دخل بيهم لغاية جوه ولما وصلوا الشعراوى قاله حسابك كام يا أسطى ؟ السواق قاله ربع جنيه .. قاله طاب خد جنيه بحاله أهوه علشان تغسل عربيتك وتعويض علشان دخلت بينا الشوية دول ... وبعدين الشعراوى سأل السواق إنت بتشتغل ليه يابنى ؟ السواق قاله علشان آكل عيش و أربي عيالي ..... قاله طاب ماتزود عليها كمان قضاء حوائج الناس وميبقاش الموضوع مقتصر علي الشغل والفلوس وبس ولازم يكون فيها حاجة لربنا .. السواق قاله والله يا مولانا لن ارد طلباً لراكب بعد اليوم

الإنسانية أهم من الفلوس وبلاش نبص للموضوع  علي إنه فلوس وبس . وواحد + واحد يساوى إتنين
خلي فيها لله وللإنسانية ولا تنسوا الفضل بينكم